|
|||
|
|
E mi son Denàro fredo
e al foghéto m'ò tirado
e son tuto ingrotolado
e no posso pì dal gelo,
e mi son Denàro fredo.
E mi son Febrar, che salda
no tien bota, Febrar curto,
e mi son mejor del tuto,
e quan'ò ciapà 'na calda,
de Febrar pi no 'se parla.
E mi son Marso dal vento,
la pelissa m'ò crompà
e me mama l'era là,
e mi adesso ghe la vendo,
e mi son Marso dal vento.
E mi son Avril polìto,
qoel che fa fiorir la tera,
la salata e l'erba bela,
e fa ogni albaro fiorito,
e mi son Avril polìto.
E mi son Majo dai fiori,
qoel che porta la girlanda,
rose e viole da ogni banda,
e che sa de mile udori,
e mi son Majo dai fiori.
E mi son Dugno, che tàio
el formento, che 'l par oro,
e mi sudo e mi laòro
e mi son mador de Majo
e mi son Dugno che tàio.
E mi son Lujo che bato
el formento e la segàla
tuto el zorno stao ne l'ara
che dal sol divento mato,
e mi son Luio, che bato.
E mi son Aosto che pesca,
a la pesca ghe son sta
e m'ò tuto renfrescà
ò pescà un lusso e 'na tenca,
e mi son Aosto che pesca.
E mi son Setembre, pieno
d'ogni sorta de li fruti,
maridève veci e puti,
stèghe sempre nel me seno,
e mi son Setembre pieno.
E mi son Otobre, el mese
che empenir fa brente e tine
bianche, rosse e scarlatine,
e mi son Otobre, el mese
che de l'ano el fa le spese.
E mi son Novembre straco,
tuto el dì son sta alla cassa
gò 'na fame che me massa
ò ciapà noma un leoràto
e mi son Novembre straco.
E mi son Dicembre in giasso,
che 'l fa batar tuti i denti,
ma i morosi i è contenti,
parché in stala i fa del ciasso,
e mi son Dicembre in giasso.
Filastrocca raccolta dall'abate Pietro Caliari
("Antiche villotte" 1900). Numerose conferme.
Musica di nostra invenzione
